სწავლანი - წმ ნილოს სინელი - ციტატები, გამონათქვამები
სწავლანი - წმ ნილოს სინელი - ციტატები, გამონათქვამები სწავლანი - წმ ნილოს სინელი, წიგნი, ციტატები
101. მარადის ისწრაფე წარმართებად კეთილთა შინა; რამეთუ რომელი მცირედსა მცირედსა ზედა დაჰრთვიდეს, მცირედსა შინა დიდსა სიმდიდრესა შეიკრებს მრავალთა მიერ საძიებელსა
102. გნებავს თუ, რაითა სატანჯველისა სატკივარობასა განერე, ნუოდეს ვის აგინებ; რამეთუ ამით განრისხნების ღმერთი
103. უკუეთუ გინებს, რაითა სახლისა შენისაგან იოტო ყოველი საგუემელი, ნუ ძვირსა უზრახავ შენ თანამეტომესა კაცსა; რამეთუ რომელი ამას ჰყოფდეს, სამართლად განაძვინებს მას
104. გნებავს თუ ყოვლისავე ცოდვისა ზეშთა ყოფაი, ნუ ისმენ საქმეთა უცხოისათა; რამეთუ მრავალ არიან შენ შორის მათგანნი, რომელთა სხუათა თანა ყოფად ეჭუ
105. ევლტოდე ამპარტავანებასა, ჰოი კაცო, დაღათუ მდიდარ იყო, ნუსადა წინაგანმწყობად შენდა გაქუნდეს ღმერთი
106. გიყუარდინ სიმდაბლე, დაღათუ დიდ იყო, რაითა აჰმაღლდე დღესა მას სასჯელისასა
107. ნუ ჰკდემ კაცსა, და ბიწი არა გაქუნდეს ყოველსა შინა ცხორებასა შენსა
108. რაჟამს ეკლესიას იყო, ნუ განსცხრები, რამეთუ წინაშე მეფისა მდგომნი არცა იცინიან, არცა განსცხრებიან
109. ნუ უგულებელს-ჰყოფ ცხორებასა შენსა, ნუცარას იქმ უკრძალველად გარეგან შჯულისა, რაითა არა მიემთხვიო უსჯულოთავე წარსაწყმედელსა
110. ყოვლითა კრძალულებითა იხსენებდ თქუმულთა ამათ, რაითა ცხორებაი შენი ბრწყინვალედ გამოაჩინონ