სწავლანი - წმ ნილოს სინელი - ციტატები, გამონათქვამები
სწავლანი - წმ ნილოს სინელი - ციტატები, გამონათქვამები სწავლანი - წმ ნილოს სინელი, წიგნი, ციტატები
81. სათნოებათა დიდებასა წმიდათაგან იჭვირობდი; რამეთუ უკუდავად დაადგრებიან მათნი დიდებანი შემდგომად სიკუდილისაცა
82. სიბოროტე მაშინ მოიძულო, რაჟამს გულად-იღო, რამეთუ აღლესულ მახვილ ბოროტისა არს იგი ჩუენ ზედა
83. უკუეთუ ასწავებ მცოდველსა, შეზავენ თანალმობითა სიტყუანი შენნი, და ესრეთ ყური მისი მოლბების, ხოლო გული განათლდების
84. რაჟამს წმიდათა ეზრახებოდი, იკითხვედ მათგან სულისათვის, ხოლო რაჟამს არა ესევითართა ჰზრახვიდე, თვით შენ იტყოდე სულისათა
85. განცხადებულისა ცხორებისა თანა დაფარულთაცა სათნოებათა მიერ განშუენდი; რამეთუ სული არცა სათნოებისაი, არცა სიბოროტისაი დაიმალვის
86. მარადის კეთილთა საქმეთა შინა მოსწრაფე იყავ, ნუსადა კერძო სრულად დამტევებელი მათი წარხვიდე
87. ესრეთ ჰრბიოდე, რაითა ეწიო, ესე იგი არს დაუცხრომელად. რამეთუ ჯერ-არს სათნოებასა შინა სრბაი, ვიდრე განსლვადმდე ამის საწუთოისა სტადიონით
88. ნუ იქმნები სულმოკლე აღსრულებისათვის მცნებათაისა; რამეთუ ესევითართა მათ ურგები შრომაი შრომასა ზედა დაერთვის
89. პირველ ჭირისაცა იღუწიდ მოგებად მოთმინებისა, რაითა ჰპოო იგი ჭირთა შინა ყოვლადსაჭურველად მომზადებულად
90. ჰბრძოდე ბოროტთა გულისსიტყუათა, და იტყოდე მათდა მიმართ, რაოდენი შჯულსა შინა თქუმულ არს